學游水要學幾多個鐘？

游水時，最常被人截住問的是「學咗幾耐？」然後又問「我學咗20堂，點解都仲係唔識？」

其實我都唔係好識答要學幾多堂先會識，因為游水，同學車唔同，唔係計「學咗幾多個鐘」；而係計，你「練咗幾多個鐘」。

游水呢家野，真係要你一條友，晌泳池度，死練爛練，晌游咗 N 米分解、N米main set之後，會突然有一下︰哦！原來係咁。跟住就突然游到。

我發現，原來好多人，係覺得咁樣好鬼悶的，所以，晌泳池游水的，總係吹水的多，堅游的少。

尤其是年紀愈大，愈難學識，一來係體能，但我覺得最主要係，大人有太多自己的「見解」，唔聽話或者太識得搵藉口唔練，游一個塘，就企晒晌度吹水，先至係最大的阻礙。 

另外有種人，見你游得幾好，會企晌度，睇你點游。呢個我真係勁唔明，晌泳池游的，你睇1000個，都唔夠你上 Youtube 求其 search 一堆片，入面個個都世界級，咩角度，咩泳式，近鏡中鏡遠鏡慢鏡都有，最重要係，唔駛錢。點解仲要俾 19 蚊，行入泳池，睇啲唔係世界級的人游呢？

就算俾個港隊你睇，真係睇完就識咩~~~~

另外就係，有教練教，是重要的，如果真心想進步，要抽時間去上下堂，我諗游水都係一樣以技巧為主的運動，真係要去學先會游得好、游得靚。

最後，我到今日，仍然覺得，游水要愈游愈快，淨係不停游全式，係唔夠的，練分解係好重要的。