Sherlock Holme 福爾摩斯

原本，我係追開美劇版的Elementary (男主角一啲都唔靚仔，但有一種charm~~~ 而....劉玉玲都演得唔錯。）

但惡耗係……佢地要停播一排，咁，唯有上網下載原著，頂癮。點知，一睇之下，又引發另一條癮，一定要追晒全部咁多個故仔。

就係咁，經過足足一個月「寒窗苦讀」(返工、食晏、放工、臨訓，每日大約2-3粒鐘），我竟然睇晒《福爾摩斯探案》英文原著！！

結論係，佢啲橋，真係好爆，唔怪之得足足100年之後，翻拍電視、電影，都咁得。但論文學修辭，同我睇開的毛姆（題外話︰佢好鬼憎《福爾摩斯》系列），又確實係差幾皮o既……但條橋得，加上佢又係幾十頁的短篇，齋睇情節已經令我o晒咀，都唔係幾得閒理佢啲修辭囉~~~~

成個系列發生的時期大約係1850至1910年之間，對我來講，除咗情節吸引之外，其次有趣的係，見到19世紀英國倫敦人的生活︰

• 出入︰一係行路，一係坐馬車、出遠門一定係搭火車；
• 通訊方法︰永遠係打電報，最勁的係出咗遠門，都可以去最近的郵局收到轉發過來的電報，呢樣我真係無諗過，慢啲就寫信。
• 照明︰原來當時，電燈尚未普及，大家都係用蠟燭，而果啲咩咩夜探情節，靠的一係月光，一係就係一個叫dark lantern的物體，好難想象吖！！
• 社交禮節︰要同一個人見面，一定要預早一日發電報或者揾messager送信通知，約實時間，出現時一定要遞咭片俾守門人，由守門人轉交當事人。非常咁古雅呀！！
• 女性地位︰唉~~~ 一如所料地低！連Holme 本人都非常之咁睇唔起女人。而女人的名聲係非常之重要，任何情書都可以成為勒索的工具，女人永遠都係受害者、係無知的。只有嫁得好夫君先可以有幸福，未免老套咗啲。就算晌《波希米亞的醜聞》入面的Irene Adler，一直被傳為Holmes唯一看得起的女性，最後都係嫁人，揾個好歸宿，未免令我感到沉悶又老套，覺得不外如是。我個人係比較喜歡The Three Gables入面的 Isadora Klein，又靚又玩得。老實，我好支持佢的犯案動機！！
  
  
  雖然係消閒書，但睇完，寫英文書信真係暢順又快趣。我真係好鍾意19世紀果啲英文唔用主語的委婉行文呀！！