詭計進行中……

呢幾日返左老家餵貓，又要再一次面對「亂過亂葬崗」o既家居環境（屋入面無辦法直行五步而唔會碰到雜物!!!!）真係頂唔住頸，於是又再變身成菲傭——開始執屋。

點解會拎晒酒店D洗頭水、梘液返黎，又唔用左佢，仲要塞晌屋入面唔同O既地方呢？唔通可以辟邪？
點解屋企己經買左一包包牙簽，仲要拎酒樓果D返黎？

點解買報紙送紙巾都要儲起佢？又係塞晌唔同角落，呢度一包，果度半包。

點解放罐頭、即食面O既架，會有一個（唔係一對）鞋墊？下面又有包臭丸呢？臭丸有毒架喎~~~~

點解所有有少少隙縫O既地方，都塞一兩個膠袋入去？又或者塞一塊類似抺枱布O既物體晌度？

點解所有突出少少O既地方，都掛一個勾晌度，然後下面勾住一大串雜物？

點解電視單、水費單、雜單，要捲埋一舊、搵橡根扎住，然後塞入一包包涼茶中間呢？

真係亂到呢——有時執開一頭，見到第二度又亂，又唔記得左執緊果度，走去執第二度。真係人都顛，完全咁干擾緊我有系統O既思路……

不過除左執屋，呢幾日己經密謀，聯絡慈善團體，將屋入面積存多年O既存貨捐左出去。再唔搞，遲多幾年送都無人要。

總之一定要晌星期二之前搞掂佢。