但見朋友在facebook上對此製作表示「睇到想嘔」，我心諗，「唔係咁嚴重吓~~~」便在網上重溫了一下。
沒錯，水準之低確是與中學生的專題研習相約，甚至有青出於藍之感。
- 男人真係鍾意女人扮蠢？然後讚佢「你好叻呀~~~」架咩？！似講到男人低左啲喎~~
每個人都有值得別人欣賞之處，朋友（不單是男女朋友）相處，都要懂得互相欣賞，才能建立尊重。而不是一方不斷訶諛奉承另一方的。這是老土電視劇裡面出現的昏君與讒臣的組合，結果通常是民不聊生。 - 另外，無一個人會鐘意第一次見面就俾人問一大堆私人問題（月入、年齡、租屋定供樓、打算生幾多個仔、拍過幾多次拖、渣咩車、戴咩錶），呢個係正常社交常識，唔係淨係男人介意，女人都介意。唔駛偷聽都知喎。
- 入面的受訪者話佢地遇到好多好離譜的女性，現實生活中我唔覺得淨係女人先會犯呢啲錯︰
- 當街鬧人——唔係淨係男人、小學生、女人、老人、黑人、西人，總之係人都好，俾人當街鬧都唔鐘意啦，這是基本對人的尊重。但我見過不少細公司的老細（男人），大大聲晌客面前小啲下屬，並夾雜粗口。旁人亦為之側目。
- 奪命追魂call——我老豆就係人辦之一；而我亦都好怕呢啲人，都會鬧爆。
- 唔准乜乜唔俾物物——多年前我都試過被一名男生在朋友聚會間阻止我點酒精類飲品，而當時小妹亦已青春不再，十八歲己經是過去式。當時我記得係鬧左佢，一句「你邊位呀？」令佢好無面，但「面是人家給的，假是自己丟的」我又可以如何？難道真的不喝自己愛喝的東西？
- 所以唔准乜乜物物並不是女性專享的毛病——當然這樣說並不表示我同意男性要容忍她們的「唔准乜乜物物」，我支持大家反抗啊！來！跟我大叫三次「你邊位啊！！」我只想說︰不是所有女生都是咁的。
- 語言無味，三句唔埋兩句講錢、講買野——男女比例均等....一見到新野，第一句「幾錢呀？」第二句「晌邊度買？」（正常男人有幾多個坐埋會傾埃及革民對當地民主進程的影響先？！你講到「穆斯林兄弟黨」有望在下次全民大選中勝出成為執政黨呢個分析的話，我完全覺得你唔需要去婚姻介紹服務。）
- 大家可能無留意，但我覺得入面訪問幾個男人都係中產以上，仲要係透過婚姻介紹服務去結識異性（仲要係「做下朋友先」）。
其實去得呢類活動，大部份人都真係想快啲結婚，拍拖過程有咁短得咁短。咁男士真係好難避免對方「目標（搵老公）為本，直指要害（經濟能力）」架喎，唔通真係俾幾舊水、甚至幾千銀黎同你風花雪月咩~~~
咁你遇到短視又功利的女性，真係好難避免的。
如果果幾位受訪者只係想識朋友，然後由朋友慢慢發展成情人，又過多幾年先考慮結婚，不如報下興趣班啦，真係無咁大壓力的。 - 所以，呢個節目的「取樣」有啲問題，不如叫做「婚姻介紹服務未能成功尋獲女伴的男性使用者的期望調查」啦。
- 男女相處並沒有必然模式。好多時呢啲節目，不論是這集《偷聽男人心》、還是早前的《港男港女》系列，個問題都係將男女兩性的特質分得似乎好清楚，然後男性有一個模型（搵到錢、有擔帶、大隻有肌肉、保護女生）要fit入去，女性又有另一個模型（要溫柔、要細心、要唔好鬧人）要fit入去，但是實際上男女關係千變萬化，而且是人夾人緣，並沒有一條「必中」的公式（戴安娜同查理斯夠標準喇掛，咪又係離婚收場。）
實際上並不是你扮成是「女人」/「男人」便可以保證你一世幸福。就算俾你嫁到個有錢佬，但佢又好孤寒，俾好少家用，但又唔俾你出去返工，因為驚俾人話養唔掂老婆，果種痛苦真係不足為外人道。
其實只要做返自己，自己的性格、人生觀，總會有日令你遇上真正投緣的另一半的。就算遇不到，能夠做自己（當然不是叫你「自我中心」啦），已經是一件超級幸福的事了。
沒有留言:
張貼留言