意見接受‧態度照舊

上週剛剛送走了一批實習生，並完成了一節檢討（當然包括自我檢討），發現自己需要再次告訴自己一件事︰實習生真是每一個都不同的。所以常常要隨機應變、懂得執生。

話說其中一名實習生，初見面的印象是他彬彬有禮、待人接物似乎都算是成熟的一類。但合作下來，卻發現他是完全不懂得和人溝通的。簡單如一些上司給予的工作指示無法按時及正確地完成；嚴重的甚至以自己的宗教背景為理由拒絕去理解某些社會議題，雖然不算是我見過的實習生之中最差的，但絕對可以列入三甲之內。 

如果要我評分，假如是ABCDEF，A為最高而F為不及格的話，我會給E、甚至會考慮給F。主要原因有以下幾項︰

• - 叫佢做的事，無做，但又話做左，差啲累到個PROJECT報錯價買貴野，之後要佢SUPER跟返晒啲野；
• - 咁唯有叫佢做啲輕省的工作，輸入下資料，但又入到錯晒，明顯無DOUBLE CHECK；
• - 淨係識做表面野︰日日返到黎懶好咁幫啲高級過佢的人斟水、問「今日有無咩幫手」——但實際上之前交俾佢的TASK己經過晒死線都未交到出黎；
• - 將自己女朋友帶返OFFICE︰雖然他沒有真的將女朋友帶回來，但用當值時間同女友煲電話粥、準備情人節禮物，仲要「知會」上司︰「唔好意思，等我整理少少野我再過黎」、或者明明成TEAM人個個兩隻手晌度準備緊道具，佢就用個膊頭夾住個電話晌度講，完全聽唔到其他人叫佢做乜。成班人晌度等佢收線。大佬，呢個世界唔係得你一個有拖拍的，醒少少當幫忙啦。
• - 而最爆係呢句，由於籌備某項同人權有關的活動，裡面涉及一啲理念的宣傳，同佢宗教信仰有衝突，佢竟然因為咁而考慮拒絕參與，並以事前不知道「原來個會支持呢啲野」，但問返佢老師點解佢會申請入黎做實習，老師話明知佢係教徒，會晌呢類理念上有出入，已經同佢解釋左，但佢都堅時申請。於是，我完全唔明發生咩事，佢係咪想咩都唔駛做。
• - 最勁係呢樣︰次次話親佢，都話「係，真係對唔住，我明白。」但依舊係鑊鑊新鮮鑊鑊金。而家諗返，應該叫佢「你下次再錯/死線前交唔出，你唔駛再返黎。」好後悔無冼出呢張皇牌。

遇著呢啲實習生，花時間同佢糾纏，係好痛苦的一件事，我覺得應該嚴重考慮建立一個允許機構提出終止學生實習的機制。

雖然事後老師都總括左佢上述問題為兩項︰

1. 時間管理——由於佢玩得太多瓣數，搞到時間好迫，次次返到黎都趕頭趕命、滾水淥腳咁，根本無進入過狀態，於是常常神不守舍，聽唔到上司指令；

2. 自我設限——常常以某些工作違返自己的信仰或原則為理由，拒絕接受，連理解都不願意，怎樣可以自我突破和成長呢？

但我懷疑呢位同學仔對於老師的苦口婆心，到底有無聽到入耳，因為他連想也不想，馬上答道︰「係，我明白。」——果刻，令我覺得，會議室啲冷氣都幾凍，都係留返啖氣暖下肚好過。